أنواع الشباب ع النت

المرحلة الأولى : ( الي يدوبك لسه متعلم يدخل نت)

طبعا العمر يتراوح من 22 الى ما فوق ... وتلاقيه اول ما يدخل هاي
ممكن نتعرف انا فلان ومن الحته الفلانيه وتحسي ان فيه حنفيه معلومات اتفتحت واي حاجة
تقوليهاله يقولك يعني ايه مش فاهم وبعد كل كلمة يقولك
اصل انا لسه جديد في النت

والنوعية دي تنقسم لقسمين :
1- يا اما متحمس وحط ف دماغه موضوع النت وعايز يتعلم
2- يا اما سمع من صحابه عن النت والبنات وجاي يجرب حظه

المرحلة الثانية: ( الي بيقعد على النت بس مش كتير)

النوع ده كل كلامه انا مشغولياتي كتير ومبحبش النت والكلام ده وبعد ما
يكلم شوية يقولك ممكن نكمل كلام في التليفون انا اصلي مبدخلش النت كتير ومليش خلق للكتابة
والحاجات دي
والنوعيه دي تنقسم الى قسمين:
1- يا اما يبقى لحوح ويفضل يطلب نفس الطلب وصباح الملل
2- يا اما يبقى عنده عزة نفس وميلحش بس هيتعصب وهيقولك اعمليلي بلوك

المرحلة التالته : ( الي قاعد على النت ليل نهار) ده بقى شرحه يطول
وينقسم لعدة انواع

1- المقموص
ده بقى قاعد وحاطط ايده على زرار الزعل اي حاجة تقوليها تبقي بتقصديه او بتقللي من شانه وبعد كام
مرة كلام ممكن يقولك اديني نمرة تليفونك ولما تعتذري هيقولك انا هحترم رغبتك وهيركبلك الوش الخشب
ومن وقت للتاني هتاخدي البلوك ف وشك فنصيحه من اولها كده اديله بلوك وديليت

2- ابو دم خفيف

ده شلل مركز ومتعرفيش مين الي خدعه وقاله ان دمه خفيف وكل كلامه قفشات وضحك والمفروض انك
تكوني مجامله وتضحكي بس منصحكيش تيجي على اعصابك

3-المودي
دي بقة شخصية بتتنوع كل يوم على حسب المود وهتحسي انك بتكلمي واحد عنده انفصام ف الشخصية
النهاردة رزين وعاقل وبكرة لاسع وبعد يومين رخم وبعدها كيوت وفريندلي طبعا الحكايه مش ناقصة جنان
كفايه الي الواحد فيه

4- اللزقه
والنوع ده عايز حزم ف التعامل معاه لأن كل كلامه انتي فين ؟ بتتاخري في الرد ليه؟ انتي بتكلمي حد ؟؟
ياعم وانت مالك بتتحشر ليه ......ولو قلتيله ثواني هيقولك ليه رايحة فين؟ متتاخريش ايه ده انتي لسه
مجيتيش ؟؟؟

5- الناصح

صباح الصداع مع كل جمله هتقوليها هتاخدي نصيحة وفيه عرض خاص قولي جملتين وخدي اربع نصايح
العرض مستمر حتى نفاد الكمية ولو على منتدى زينا كده هتلاقيه بيقولك ليه حطيتي التوبيك ده وليه شيلتى
الصورة دي وحطيتي التانية انا انصحك انك تخليه يحصل اخواته الي فاتوا يعني بلوك وديليت

6- الحبيب
هيقول
انا فيا جاذبية وكل البنات بتعجب بيا ....... ايام ما كنت فالكليه
كنت عامل ازمه والبنات بتتخانق عليا......
المصيبة بقى ان اي جمله هتقوليها هيفهم ان انتي معجبه اصله مش بمزاجك هتحبيه يعني هتحبيه

8- الكداب

من اول الأسم والسن واي معلومة خدتيها كدب في كدب ومتعرفيش ليه ده بقىانصحيه وخليه يغير اسمه على
الماسنجر ويخليه مسيلمة الكداب

9- العبيط
ده هتلاقيه على طول حاطط صورته وذنب عليكي تتفرجي ويشيل الصورة دي يحط التانية وكل شوية يفتح
الكاميرا مع نفسه

10-العجوز
ده ممكن يكون على النت من سنة 96 واتخرج واشتغل واتجوز وجاب عيال ولسه قاعد يتعرف على بنات
وكل ما يكلم واحدة يقنعها انه مش متجوز وبيدور على عروسة وصباح السرحان ولو جربتي كل يوم تدخليله
بايميل غير التاني هتسمعي قصة حياته كل يوم مختلفة

اتمني انه محدش يزعل

هههههههههههههه
موضوع رائع يا جى جى
بس همه ازاى بيدخله على النت
اصلى انا عمرى مدخلت على النت ده

ههههههههههههههههه
لا يا راجل ع اساس انك فين دلوقت؟؟؟!!!!!!!!!!!

نورت التوبيك يا محمد
وبعدبن انا اكيد بقصد الشات
طب بجد مش هي دي انواع الشباب ع النت؟ ايه رايكم

اه ولله عندك حق
بس كل الانواع ده من الشات اساسها ايه؟؟؟
(البنت) مش كده برده وله ايه!!!!!

مش دايما
بصراحة الاولاد ليهم اسلوب غريب ع الشات بالذات
ياما يبقي صريح جدا بدرجة الوقاحة ياما يكون محترم اوي بس لو عبر للبنت عن انه حبها بيكون كداب ف الاول وبعدين يشوف رد فعل البنت فيقرر اذا كان بيحبها بجد ولا لأ وبعدين هيسبها بعد ما هي تتعلق بيه

نفس الكلام البنات ف بنات وقحة جدااااااااااااااااااا وبصراحة الوقاحة لما بتيجي من البنت بيبقي شئ يجنن مش عارفة ازاي بيطلع منهم الحاجات دي
بس انا من راي ان حتي لو البنت اعجبت بولد خاصة ع النت تمحي المشاعر خالص لانها هتتعب بعد كده
تقبلوا مروري وشكرا

فعلا والله عندك حق

مرسى ع الموضوع

مرسي علي التوبيك الرائع بس بجد انتي عندك حق في كلامك بس المشكلة في البنت مع احترامي ليها هي اللي بتخلي الشاب يكلمها بالاسلوب اللي هي عايزاه باي اسلوب بقي بس انا من راي ان اي شاب يكلم بنت علي النت من غير ما يعرفها ويقولها ان هو معجب بيها او ارتاح ليها ياريت ما تصدقهوش ماتزعلوش يا شباب انا مش قصدي عليكم

ما فيش حب ع النت اصلا ده كله كدب

هي صعبة بس مش مستحيلة لانها حصلت امامي بس نادرا لما تلاقي اتنين مخلصين لبعض بلاخص اللي بيتعرفوا من علي النت

وانت هتعرف منين الاخلاص ده؟
مش ف دليل يثبتلك
ومش دايما الاحساس بيصيب

لالالالالالالالالالا
النت يا جى جى يعتبر من الاسس الى بيتوجد منها الحب

مرسي ياجماعه وميرسي ليكي ياجيجي بس انا عايز اقول ان النت ده للمتعه فقط والتسليه للزهقانين بس فبيسلوا وقتهم بيه من الكلام والهزار واي حد يعمل علاقه علي النت بتبقي وهم من الطرفين وهما بيكونوا حاسيين بكده لكن بيحبوا يرفهوا مع بعض علي النت لكن لوشافوا بعض يلاااااااااااااااااااااااهوااااااااااااي هيقولها هو انا كنت بكلمك انتي لاااااااااااااااااا مش معقول وهيعد يضرب نفسه ميت الم وهي هتقوله انا انا انا انا كنت بكلمك انت اييييييه الاشكال الزباله دي اللي بتتلزق فينا دي ويالهوي علي اللي هيحصل تاني منهم هي دي اخرت اللي يصاحب علي النت ويا حظه لوهما الاتنين شافوا بعض وارتاحوا لبعض برضو اكييد 100 ف 100 هيرموا بعض لانهم محسوش بمشاعر بعض لما بداوا علاقتهم لانهم مكنوش عارفين بعض وياريت اللي عنده اي تنبيه او اي حاجه غلط فيها يكتبها بوضووووووح

بس يا جماعة ممكن فعلا والله يحصل حب بين اي اتنين من علي النت بس نادرا بس صدقون ممكن بجد بس اوعي تعملوا انتم كده

ههههههههههههههههههههههههههههه
انا أخر من يعلم بالموضوع ده ولا ايه
بجد يا جيجي موضوع جااامد
وتسلم على كل ده
وعندك حق فى كل اللى قولتيه
بس انا بحب ديمن التوسط بين كل ده
أما بالنسبه للحب ع النت فأنا مش بعترف بيه اوى
وزى ما بيقول نور نادر بس مش مستحيل
نادر انك تلاقى الانسانه اللى ترتاحلها وتفهمها وتفهمك
لكن مش مستحيل انكم ترتبطوا مع بعض وتحققوا آمالكم
وتكملو حياتكم وأكيد الاهداف صادقه ومتوافقه مع الاتنين
تقبلو مرورى بفائق الاحترام لأى شخص
وياريت مش أكون طولت عليكم

بحبك

مشكورين كتير ع اراءكم
وف نهاية كل واحد ليه وجهة نظره وفي اللي بيصيب وفي الي بيخطئ
وربنا يعافينا من شر النت

نورتوا االتوبيك

» عالم الالعاب على النت
» انواع البنات على النت
» ترجمة لغة الشباب
» انواع الشباب
» لغة العيون بين الشباب والبنات