بحبك ياريس

بحبك يا ريس من ايام شبابك



...وبحلم بيوم أشوف فيه جنابك

تزورني في داري وتقضي نهاري
و تاخد الماهيه وتصرف بدالي

تكع الدروس وتدفع ايجاري
ورسم النضافة ورسم المجاري

تخش في طابور لنص العصاري
وتقسم معايا رغيف قمح روسي

مسرطن مكلكع مدخن حراري
وتحلم بلحمة و فرخة حباري

يجيلك فلافل ومش وبصاري
و تاكل خضارنا بطعم المجاري

و تركب في توك توك يلف الحواري
ويطلع مطب وينزل في حفرة و حلة مجاري

تقابل شباب في عمر الزهور
عالرصيف في شارع وتحت الكباري

محشش مبرشم معندوش مصاري
ووشه مشلفط وله جسم عاري

هتعرف ساعتها تفرق ما بين
عيشة سعاتك وعيشة الجواري

بحبك يا ريس

بحبك ياريس من ايام شبابك
وبحلم بيوم اشوف فيه جنابك

تزور أهل غزة في ظل الحصار
وتسمع دعاهم عليك ليل نهار




و أم بتصرخ في حالة انهيار
تدور عيالها في وسط الدمار

وأطفال وجوهم عليها غبار
و رافعين ايديهم بعلامة انتصار

وعايشين حياتهم في حالة احتضار
ما بين هم فقر وبين ضرب نار

ومن كتر جوعك يجيلك دوار
وتطلب علاج يقولك حصار

وتحتاج حديد عشان تبني دار
وتحتاج حفايض والبان صغار
وتحتاج تعالج جراحات كبار

وتحتاج تسافر لخارج الديار
يسدوا المعابر عليك ليل نهار

وتصرخ تنادي يا عالم يا هوو
هموت ارحموني وفكو الحصار
يجيك رد بارد بطعم المرار
رئيس مصر مشغول بيبني الجدار

الله عليك يا درش

موضوع تحفة والله

شكرا على مرورك يامان ويارب دايما مواضيعى تعجبك

بجد الموضوع جامد لدرجة انى كنت هعيط بسبب المأساة اللى احنا عايشينها دى والريس مش بيتصرف فى حاجة

لا طبعا بلدنا احسن بلد وحكومتنا احسن حكومة وريسنا احسن ريس بس العيب فينا احنا
(بينى وبنكم خايفة من امن الدولة )هههههههههههههههههههههههههههههههههه
بجد موضوعك جميل جدا تسلم ايدك

هههههههههههههه
جميله جدا يا صافى سمعتها قبل كده وكان نفسى اسمعها تانى
شكرا ليك

هى خربانه خربانه يا سمسم
متخافييييييييييش
هههههههههه

تسلم ايدك يا درش
بجد جامده

تسلموا للمروركم ياشباب